CAMPADEMY LƏĞV VƏ ÖDƏNİŞİN GERİ QAYTARILMASI SİYASƏTİ

I FƏSİL. ÜMUMİ MÜDDƏALAR

1.1. Bu Ləğv və Ödənişin Geri Qaytarılması Siyasəti (bundan sonra – "Siyasət") CAMPADEMY MMC (bundan sonra – "CAMPADEMY") tərəfindən təşkil olunan proqramlar üzrə qeydiyyatın ləğv edilməsi, proqramda iştirakdan imtina edilməsi, proqramın dəyişdirilməsi və ödənişlərin geri qaytarılması qaydalarını müəyyən edir.

1.2. Bu Siyasət CAMPADEMY tərəfindən təşkil olunan bütün gündüz, düşərgə, yay məktəbi, təlim, seminar, ekskursiya və digər proqramlara tətbiq edilir, əgər konkret proqram üzrə ayrıca qayda müəyyən edilməmişdirsə.

1.3. Valideyn proqram üzrə qeydiyyatı tamamlayarkən bu Siyasətlə tanış olduğunu və onun şərtlərini qəbul etdiyini elektron qaydada təsdiq edir.

1.4. Bu Siyasət CAMPADEMY ilə Valideyn arasında bağlanmış Müqavilənin ayrılmaz tərkib hissəsidir və Müqavilə ilə birlikdə tətbiq olunur.

1.5. Bu Siyasətdə istifadə olunan anlayışlar Müqavilədə müəyyən edilmiş mənalarda istifadə olunur.

1.6. Bu Siyasətin məqsədi proqram iştirakçılarının və Valideynlərin hüquq və vəzifələrini, eləcə də ödənişlərin geri qaytarılması ilə bağlı vahid və şəffaf qaydaları müəyyən etməkdir.

1.7. Bu Siyasətdə "çəkilmiş xərclər" dedikdə, iştirakçı üçün proqramın təşkili məqsədilə CAMPADEMY tərəfindən əvvəlcədən həyata keçirilmiş və ya ödənilməsi öhdəliyi yaranmış xərclər nəzərdə tutulur. Bu xərclərə, o cümlədən, qidalanma, yerləşdirmə, nəqliyyat, sığorta, geyim və ya inventar, çap və tədris materialları, biletlər, tərəfdaş xidmətləri, bank və ödəniş sistemlərinin komissiyaları və proqramın təşkili ilə bağlı digər sənədləşdirilə bilən xərclər aid edilə bilər.

1.8. Bu Siyasətdə "əsaslı səbəblər" dedikdə xəstəlik, qəza, yaxın ailə üzvünün vəfatı, məhkəmə və ya dövlət orqanlarının qərarları və CAMPADEMY tərəfindən əsaslı hesab edilən digər hallar nəzərdə tutulur.

1.9. Bu Siyasətdə nəzərdə tutulmayan məsələlər Azərbaycan Respublikasının qanunvericiliyinə, Müqaviləyə və CAMPADEMY-nin digər daxili sənədlərinə uyğun həll edilir.

II FƏSİL. ÖDƏNİŞ QAYDALARI

2.1. Proqramda iştirak ödənişlidir və ödənişin məbləği CAMPADEMY tərəfindən hər bir proqram üzrə ayrıca müəyyən edilir.

2.2. Ödəniş CAMPADEMY tərəfindən müəyyən edilmiş elektron ödəniş sistemləri, bank köçürməsi və ya digər qanuni ödəniş üsulları vasitəsilə həyata keçirilə bilər.

2.3. İştirak yalnız aşağıdakı şərtlər birlikdə yerinə yetirildikdən sonra təsdiq edilmiş hesab olunur:

• qeydiyyatın CAMPADEMY tərəfindən təsdiq edilməsi;
• bu barədə Valideynə məlumat verilməsi;
• proqram üzrə müəyyən edilmiş ödənişin tam və ya CAMPADEMY tərəfindən icazə verilmiş hissəsinin həyata keçirilməsi.

2.4. CAMPADEMY müəyyən proqramlar üzrə tam ödəniş, hissə-hissə ödəniş və ya əvvəlcədən avans ödənişi tətbiq edə bilər. Bu halda ödəniş şərtləri proqram üzrə ayrıca elan edilir.

2.5. Valideyn ödənişi müəyyən edilmiş müddətdə həyata keçirmədikdə CAMPADEMY qeydiyyatı ləğv etmək, iştirak yerini digər müraciət edən şəxsə təqdim etmək və ya qeydiyyatı təsdiq etməmək hüququna malikdir.

2.6. Elektron ödəniş zamanı bank, ödəniş sistemi və ya digər xidmət təminatçılarından irəli gələn texniki nasazlıqlara görə CAMPADEMY məsuliyyət daşımır. Belə hallarda tərəflər problemin aradan qaldırılması üçün qarşılıqlı əməkdaşlıq edirlər.

2.7. Ödənişin həyata keçirilməsi Valideynin bu Siyasəti, Müqaviləni, Daxili Qaydaları və CAMPADEMY-nin digər müvafiq sənədlərini qəbul etdiyini aradan qaldırmır və həmin sənədlərin tətbiqinə mane olmur.

2.8. Ödənişin təsdiq edilməsi proqramda iştirakın bütün hallarda təmin olunması demək deyildir. CAMPADEMY Müqavilədə və digər daxili sənədlərdə nəzərdə tutulmuş hallarda proqramın tarixini, qrupunu və ya keçirilmə formasını dəyişdirə, proqramı təxirə sala və ya ləğv edə bilər. Bu hallarda geri ödəniş bu Siyasətin müvafiq müddəalarına uyğun həyata keçirilir.

III FƏSİL. PROQRAMIN LƏĞVİ VƏ YA DƏYİŞDİRİLMƏSİ

3.1. Valideyn proqram başlamazdan əvvəl istənilən vaxt proqramda iştirakdan imtina edə bilər. Bu halda ödənişin geri qaytarılması bu Siyasətin IV Fəslinə uyğun həyata keçirilir.

3.2. CAMPADEMY proqramın təşkili ilə bağlı zəruri hallar yarandıqda proqramın başlanma tarixini, müddətini, proqramını, keçirilmə yerini, qrupunu və ya digər təşkilati şərtlərini dəyişdirmək hüququna malikdir. Bu barədə Valideynə mümkün olan ən qısa müddətdə məlumat verilir.

3.3. Minimum iştirakçı sayı formalaşmadıqda, proqramın keçirilməsi mümkün olmadıqda, fors-major hallar baş verdikdə və ya CAMPADEMY-dən asılı olmayan digər hallar yarandıqda CAMPADEMY proqramı təxirə sala, başqa tarixə keçirə, iştirakçıları başqa qrupa yönləndirə və ya proqramı ləğv edə bilər.

3.4. Proqramın CAMPADEMY tərəfindən ləğv edilməsi və ya keçirilməsinin mümkünsüz olması hallarında CAMPADEMY öz seçimi ilə:

• proqramın başqa tarixə keçirilməsini;
• iştirakçının başqa qrupa və ya proqrama yönləndirilməsini;
• və ya ödənilmiş məbləğin tam geri qaytarılmasını təmin edə bilər.

3.5. Valideyn CAMPADEMY tərəfindən təklif olunan alternativ proqramı və ya yeni tarixi qəbul etmədikdə, ödənişin geri qaytarılması bu Siyasətin IV Fəslinə uyğun həyata keçirilir.

3.6. İştirakçının Müqavilənin, Daxili Qaydaların və ya CAMPADEMY tərəfindən müəyyən edilmiş digər qaydaların kobud və ya təkrar pozulması nəticəsində proqramdan kənarlaşdırılması proqramın CAMPADEMY tərəfindən ləğvi hesab edilmir və bu halda ödənişin geri qaytarılması yalnız bu Siyasətdə nəzərdə tutulmuş hallarda mümkündür.

3.7. İştirakçının və ya Valideynin təşəbbüsü ilə proqramın vaxtından əvvəl tərk edilməsi proqramın CAMPADEMY tərəfindən ləğvi hesab edilmir və ödənişin geri qaytarılması bu Siyasətin IV Fəslinə uyğun müəyyən edilir.

IV FƏSİL. ÖDƏNİŞİN GERİ QAYTARILMASI

4.1. Ödənişin geri qaytarılması yalnız bu Siyasətdə nəzərdə tutulmuş hallarda və qaydada həyata keçirilir.

4.2. Valideyn proqramın başlanmasına 14 (on dörd) və ya daha çox təqvim günü qalmış proqramda iştirakdan imtina etdikdə, CAMPADEMY tərəfindən həmin iştirakçı üçün artıq çəkilmiş və sənədləşdirilə bilən xərclər çıxıldıqdan sonra qalan məbləğ hesablanır. Hesablanmış məbləğ ödənilmiş vəsaitin 50 faizindən çox olduqda həmin məbləğ, digər hallarda isə ödənilmiş vəsaitin 50 faizi geri qaytarılır. CAMPADEMY əsaslı hallarda bu maddədən kənar fərdi qərar qəbul edə bilər.

4.3. Valideyn proqramın başlanmasına 14 təqvim günündən az müddət qaldıqda proqramda iştirakdan imtina etdikdə, ödəniş geri qaytarılmır, bu Siyasətdə nəzərdə tutulmuş əsaslı hallar istisna olmaqla.

4.4. İştirakçının proqram başlamazdan əvvəl xəstələnməsi və ya iştirakını mümkünsüz edən digər əsaslı səbəblər yarandıqda, bunu təsdiq edən müvafiq sənədlər təqdim edildiyi halda, CAMPADEMY öz qərarı ilə:

• iştirakçının qeydiyyatını başqa tarixə keçirə bilər; və ya
• çəkilmiş xərclər çıxıldıqdan sonra ödənişin tam və ya qismən geri qaytarılması məsələsinə fərdi qaydada baxa bilər.

4.5. İştirakçının proqram başladıqdan sonra xəstələnməsi və ya digər əsaslı səbəblərlə proqramı davam etdirə bilməməsi hallarında CAMPADEMY çəkilmiş xərclər çıxıldıqdan sonra ödənişin tam və ya qismən geri qaytarılması məsələsinə fərdi qaydada baxa bilər.

4.6. İştirakçının və ya Valideynin əsaslı səbəb olmadan proqramı vaxtından əvvəl tərk etməsi və ya proqramdan imtina etməsi halında ödəniş geri qaytarılmır.

4.7. İştirakçının Müqavilənin, Daxili Qaydaların və ya CAMPADEMY tərəfindən müəyyən edilmiş digər qaydaların kobud və ya təkrar pozulması nəticəsində proqramdan kənarlaşdırılması halında ödəniş geri qaytarılmır.

4.8. CAMPADEMY tərəfindən proqramın ləğv edilməsi və ya keçirilməsinin mümkünsüz olması hallarında, proqramın ləğv edilməsinin səbəbləri, yaranmış şərait və iştirakçıların maraqları nəzərə alınmaqla, CAMPADEMY aşağıdakı həll yollarından birini tətbiq edə bilər:

• proqramın başqa tarixə keçirilməsi;
• iştirakçının başqa qrupa və ya proqrama yönləndirilməsi;
• ödənilmiş məbləğin tam şəkildə geri qaytarılması.

4.9. Minimum iştirakçı sayı formalaşmadıqdan sonra proqramın keçirilməməsi və bu səbəbdən alternativ proqram və ya tarix Valideyn tərəfindən qəbul edilmədiyi halda, ödənilmiş məbləğ tam həcmdə geri qaytarılır.

4.10. Fors-major halları, dövlət orqanlarının qərarları və ya CAMPADEMY-dən asılı olmayan digər səbəblər nəticəsində proqramın keçirilmə tarixinin, məkanının və ya formasının dəyişdirilməsi ödənişin avtomatik qaytarılması üçün əsas hesab edilmir. Belə hallarda CAMPADEMY vəziyyətə uyğun alternativ həll təklif edə bilər.

4.11. Bu fəsildə nəzərdə tutulmuş bütün geri ödənişlər yalnız V Fəsildə müəyyən edilmiş müraciət və geri ödəniş prosedurlarına uyğun həyata keçirilir.

V FƏSİL. GERİ ÖDƏNİŞ PROSEDURU

5.1. Ödənişin geri qaytarılması yalnız Valideyn tərəfindən CAMPADEMY-yə yazılı və ya elektron müraciət edildikdən sonra bu Siyasətdə nəzərdə tutulmuş hallarda həyata keçirilir.

5.2. Geri ödəniş üçün müraciətdə aşağıdakılar göstərilməlidir:

• iştirakçının adı və soyadı;
• Valideynin adı, soyadı və əlaqə məlumatları;
• geri ödəniş tələbinin səbəbi;
• zəruri olduqda tələbi təsdiq edən sənədlər.

5.3. Əsaslı səbəblərlə bağlı geri ödəniş tələb edildikdə CAMPADEMY müvafiq təsdiqedici sənədlərin təqdim edilməsini tələb edə bilər.

5.4. CAMPADEMY müraciəti və təqdim edilmiş sənədləri bu Siyasətin müddəalarına uyğun qiymətləndirərək müvafiq qərar qəbul edir. Qəbul edilmiş qərar əsaslandırılmış hesab olunur və Valideynə elektron poçt, Valideyn Portalı və ya CAMPADEMY tərəfindən müəyyən edilmiş digər elektron və ya yazılı kommunikasiya vasitələri ilə bildirilir.

5.5. Geri ödəniş barədə müsbət qərar qəbul edildiyi halda vəsait, bir qayda olaraq, ödənişin həyata keçirildiyi eyni bank hesabına, bank kartına və ya CAMPADEMY tərəfindən razılaşdırılmış digər ödəniş vasitəsi ilə qaytarılır.

5.6. Geri ödəniş barədə müsbət qərar qəbul edildiyi tarixdən etibarən CAMPADEMY geri ödənişi 30 (otuz) təqvim günü müddətində icra edir. Bankların və ya ödəniş xidməti provayderlərinin emal müddəti bu müddətə daxil edilmir.

5.7. Bankların, ödəniş sistemlərinin və ya digər ödəniş xidməti provayderlərinin emal müddəti, texniki nasazlıqları və ya CAMPADEMY-dən asılı olmayan digər hallar səbəbindən geri ödənişin gecikməsinə görə CAMPADEMY məsuliyyət daşımır.

5.8. Geri ödəniş zamanı banklar, ödəniş sistemləri və ya digər xidmət təminatçıları tərəfindən tutulmuş komissiyalar, əgər həmin komissiyaların qaytarılması mümkün deyildirsə, geri qaytarılan məbləğdən çıxıla bilər.

5.9. CAMPADEMY geri ödənişin həyata keçirilməsi üçün əlavə məlumat və ya sənədlər tələb etmək hüququna malikdir. Valideyn tərəfindən tələb olunan məlumat və ya sənədlər CAMPADEMY tərəfindən müəyyən edilmiş müddətdə təqdim edilmədikdə, müraciət baxılmamış saxlanılır və ya təmin edilmir.

5.10. Bu Siyasətdə nəzərdə tutulmuş geri ödənişlər yalnız proqram üzrə faktiki ödənilmiş məbləğə şamil edilir və CAMPADEMY-dən hər hansı əlavə zərərin, faizlərin, cərimələrin və ya digər kompensasiyaların ödənilməsi öhdəliyini yaratmır.

5.11. Geri ödəniş yalnız ödənişi həyata keçirmiş Valideynə və ya onun yazılı müraciəti əsasında qanunvericiliyə uyğun səlahiyyət verilmiş şəxsə həyata keçirilir.

VI FƏSİL. YEKUN MÜDDƏALAR

6.1. Bu Siyasət CAMPADEMY tərəfindən təsdiq edildiyi tarixdən qüvvəyə minir və yeni redaksiyası təsdiq edilənədək qüvvədə qalır.

6.2. CAMPADEMY Azərbaycan Respublikasının qanunvericiliyinə uyğun olaraq bu Siyasətə dəyişiklik və əlavələr etmək hüququna malikdir.

6.3. Bu Siyasətin qüvvədə olan aktual redaksiyası CAMPADEMY-nin rəsmi internet səhifəsində və ya Valideyn Portalında yerləşdirilir. Dəyişikliklərdə fərqli tarix göstərilmədiyi halda onlar dərc edildiyi tarixdən qüvvəyə minir.

6.4. Bu Siyasətdə nəzərdə tutulmayan məsələlər Azərbaycan Respublikasının qanunvericiliyinə, Valideyn ilə bağlanmış Müqaviləyə və CAMPADEMY-nin digər müvafiq daxili sənədlərinə uyğun həll edilir.

6.5. Bu Siyasətin hər hansı müddəasının etibarsız və ya icra olunması mümkün olmayan hesab edilməsi digər müddəaların etibarlılığına və tətbiqinə təsir göstərmir.

6.6. Bu Siyasət üzrə müraciətlər, suallar və ya təkliflər CAMPADEMY-yə aşağıdakı əlaqə vasitələri ilə təqdim edilə bilər:

• Elektron poçt: info@campademy.az
• Telefon: +994 55 323 22 67
• Vebsayt: www.campademy.az

6.7. CAMPADEMY bu Siyasətin tətbiqi ilə bağlı qərarlarını səlahiyyətli əməkdaşları, proqram rəhbəri və ya digər səlahiyyət verilmiş nümayəndələri vasitəsilə qəbul edə bilər.